dimanche 15 novembre 2015

مبروك راح

الرّيڨ شاح،
و الصّوت بحاح،
مالصّياح،
و النواح،
على ولاد بوزيد الملاح،
وين طايحة كالذّبّان الارواح،
وين الفجعة مع كلّ نباح،
وين ورا كل حجرة سفّاح...

و مبروك طلع وجوه الصّباح،
سارح، و ما همّو في إلّي ڨال سُرّاح،
كِسره و زيتون و كعيبة تفّاح،
و الضّحكة رنّانة، و العينين سْماح...

عڨاب عشيّة، و اللّيل عدّو طاح،
بين روايح الكليل و صفير الارياح،
طلعلو بو لحية ذبّاح،
غدرو، و الدّم ساح،
و في غمضة التّصويرة تبلاح...

مبروك راح،
في عمر النوّار راح،
ما شاف في دنيتو نجاح،
ما عاش افراح،
خلّى فينا ليعة، و دمع ما شاح...

Aucun commentaire: