ما فيبالكمش؟؟؟
ماهو حومة البلوقوسفير تطل على البحر، و حسين عندو بنية قديمة في اخر السربوحة، داير بيها البحر من كل شيرة، و فيها قعدة ياسر سمپاتيك، ياكاهو، رممها و حلها باقات اي باقات...
ولاتشي هاذيكا البقعة البرانشي الي تلقى فيها شباب الحومة الكل!! ديما تغلي تقول حمام: هاي وحدة تتلهمڤ على صاحبتها في رشفة بوڤا بيضا، هاو الأخر يلوج من عند شكون يتسلف بريكية، هاي الاخره داخلة لا لشيء الا لانها فادة تلوج في شكون تسيب عليه شوية مساطة... الحاسيلو العباد كي البطاطا، والبيوع يجيبو ربي...
علاش مش نهار، الشعب الكريم الكل غادي، كيف العادة، و ك.م.ر و نوسترا قاعدين في الطاولة اللي بحذا الشباك، الاول شايش في الامبوبة درا فاش يخمم، و الثاني يدور في عينيه في الصالة يلقاشي شكون يكعبو في 200 فرنك... هوما هكاكا، و يدخل كيبيتز، يجي يقعد بحذاهم:
كيبيتز:سمعتو بالحريقة؟؟؟
ك.م.ر: نشالله خير، اش ثما زادة؟؟؟
كيبيتز: حريقة في الصمعة، و محصورين الفوق اربعة مالناس...
نوسترا: اربعة؟؟؟ ظاهر الحاج ازواو طلع باش يذن خمجها، اما شكون معاه؟؟؟
كيبيتز: ماهو انا زاده في بالي هاكاكا،اما هاو الحكاية مالاول:
ماني كنت قاعد في القهوة، و نسمع كان في زمارة الحماية المدنية،اش ثمة؟ قالك حريقة في الصمعة، و ثمة عباد الفوق... شكونهم؟؟ حد ما يعرف!!!
ايا خرجت العباد تتجارى، الي خايف، و الي شامت، و الي ينسنس باش يلقى ما يحكي الليلة في القهوة... و تصبت الحومة الكل قدام الجامع، و كثر الحديث، و الاشاعات،
انا خممت كيف نوسترا و قلت : هذا ما يكون كان الحاج ازواو طلع بش يذن الظهر، و لوح السقارو ياخي جا عل الحصيرة، تحرقت... و ما نفيق كان بالعنقية كيف تهبط على كرايمي، نتلفت نلقاه الحاج يقحرلي و يقول: و من وقتاش نتكيف الدخان انا؟؟؟ عندي شيشتي ما نبدلهاش لا بكريستال، لا بمارلبورو، لا بهافان!!! غير قول انشاالله تمنع شيشتي اللي مخليها الفوق!!!...اما هذي نعرفها عمايل شكون، بعيني شفت ارتيكيلي قدام الجامع واقف و بجنبو بيدون قاز، و هوا ضربة اثنين يغزر للمنڤالة متاعو، ظاهر يستنا في شكون من صحابو بش يعملو اندرا اش من عملة!!! ... مازال ماكملش كلامو و يجاوبو ارتيكيلي من وراه: يا حاج ريض يهديك!! راني كنت نستانا في خالتي تروح مالسوق و تحلي الباب، مشيت باش نشري الڤاز نسيت مفاتحي، كلمتها قلتلها نستناك قدام الجامع!!! بربي هاذي زادة بش تلصقوها فيا؟؟؟...
ايا مانطولش عليكم الهدرة، اللي يقولو هذي عمايل فلان، ينطق و يقولهم هاني هوني... ما عرفوش شكون محصور في الصمعة...
بعد ساعتين من العمل الدؤوب، نجمو جماعة الحماية يطفيو النار و يحطوا سلوم باش يهبطو عليه العباد اللي الفوق...ايا بداو هابطين، و الجماعة لوطى يستناو فيهم تقول مراهقين يستناو في فنان في المطار...
هبط الاول، شكون يطلع؟؟ عاشور الناجي!! و جوست بعدو شكون؟؟؟ عماد حبيب!!!
ك.م.ر: بربي؟؟؟ توا هاذوكم وجوه متاع جامع؟؟؟ شنوة زعما تابو؟؟؟ يا ذنوبي!!
نوسترا: تي هاوكا حتى هوما، هوما دخلو الجامع منا، و هوا شعلت فيه النار منا!!! ... هذا كان موش هوما شعلو فيه النار!!!
كيبيتز: تي هاو جايك الحديث، في عقلك!
الاربعة اللي هبطو من الصمعة، عاشور، و عماد، و بعدهم ... فوزي بن يحمد، و ونس!!
نوسترا: و شكونهم هاذوما؟؟؟ مانعرفهمش!!!
ك.م.ر: تي احسن، صحاب عماد و عاشور، تي هوما الاربعة، اربعة روس في شاشية!!
نوسترا: بالله؟؟؟ مالا فاش طالعين يعملو في الصمعة ؟؟؟
كيبيتز: ماهو هاذاكا اش سئلناهم!! تململ عاشور منا، تنحنح منا، وامنها نطق: قالك اشتهاو يلعبو طرح نوفي في الجامع!!!!هاكاكا خطرتلو!!! اما رد بالك!! راهم ما لعبوش على الفلوس!!!... قالك يلعبو على كعبة برڤدان سرقوها من دار المعلم و هوما جايين!!!
ك.م.ر: قلة حياء!!! قلة تربية!!!
نوسترا: و الله!!! هكا يطيب البرڤدان في دار المعلم، و انا ما فيباليش!!؟؟؟
ك.م.ر: براس والديك اخطاني منك، و انتي داك كان في كرشك!!! ايه، مالا كيفاش صارت الحريقة؟؟
كيبيتز: قالك جمرة طاحتلهم من الكانون، و طاحت في خنسولة... هوما حقروها قالو تو تطفى... ياخي شيء!! هاذيكا السبب متاع الحكاية الكل!!
نوسترا: شيء يوقف المخ!!!.....................بون ايا، انستو، انا لازمني نسرح
ك.م.ر: يا ولدي ايجا وين ماشي؟؟؟ شبيك مزروب؟؟؟
نوسترا: خليني نجري نخلطشي على الاقل على كعبات برڤدان من دار المعلم... قبل ما يقفزو بيهم فروخ الحومة!!
ك.م.ر: ماكش بش تكمل الحكاية للاخر؟؟؟
نوسترا: اش مزال؟؟ هاي وفات الحكاية!!
ك.م.ر: مازالت نحب نعرف اهم حاجة: الشيشة متاع الحاج، منعت ولا لا؟؟؟
2 commentaires:
Coucou, merci d'être passé chez nous...
Nous donnerons bientôt la réponse à la devinette.
By the way,jette un coup d'oeil de temps en temps, on poste des annonces sur des trucs à vendre, à petits prix. On propose de tout. Et si tu as des trucs à vendre, on peut les poster sur le blog, et te permettre de trouver facilement un acheteur?
Contacte-nous.
lesfollesaffairesdelolita@gmail.com
ههههههههه
حلوة برشة القصة، أمّا فمّا تكملة وإلاّ لا؟
Enregistrer un commentaire