mardi 1 juin 2010

......كلامي

يا ناس، يا كِياس،
إسمعوا كلامي وإفهموا الكمباص،
بدا يطلعلي الدّم للرّاس،
و باش نقول كلام عفّاس،
هرّاس،
يهدّ الجّبال و يشيّب الاعراس،
كلام خارج مالقلب مع الأنفاس،
لاهب كالشّمعه ليوم النّاس،
يضوي عالمغبون في ظلمة الأحباس،
و يدفي الزّوالي الرّاقد في الكيّاس،

يا ناس,
كلامي ياقوت، و جوهر و ألماس،
يبرق كالذّهب و يرنّ كالنّحاس،
كلامي لا قالو عنتر لا بو نوّاس،
لا تقرى في كتاب، لا تكتب في كرّاس،

يا ناس,
كلامي زمني، شبع خبّيزه و ترفاس،
كلامي مواكب عصر الواب و الآس آم آس،
كلامي فاس،
كلامي أُمّاس،
تضرب الوتر الحسّاس،
تحيّر عليك الهلواس،
ياكلك الوِسواس،
تدور للدبّوزه و الكاس،
تسخايل ترجع لاباس؟
تهبل، تولي تدور كالرّقّاص،
لا تفهم روحك فايق لا في نعاس،
اسس! اسس و اقطع الانفاس،
و إسمع كلام، بالكنوز يتقاس...

1 commentaire:

Anonyme a dit…

whats up everyone


great forum lots of lovely people just what i need


hopefully this is just what im looking for, looks like i have a lot to read.